امتي يطلع النهار؟؟

قولت عايزة ارجع بقوة بس لقيت الحال مش اللي هو

كل اما اجي اكتب عن حدث اخاف يجي اليوم واتحبس

وانا لسة صغيرة مش قد الحبس والبهدلة

قولت اكتب عن اللي جوايا لقيته فراغ كبير مالوش نهاية

حاسة ان الليل طول اوي وانا والقمر بقينا اصحاب

امتي يطلع النهار بقي؟ اصله طول في الغياب

انكسار وانهزام وحيرة والم امتي بقي ينتهي عصر العذاب؟

هو العيب عيب مين ؟ حكومة ولا مواطنين؟

طب احنا ليه ساكتين ؟ وبحالنا كدة راضيين ؟

ليه نسينا احنا مين ؟ فراعنة وفلاحين

علي فين علي فين يا بلد رايحيين

والله تعبنا تعبنا بكا وانين

يوووووه تعبت من اسئلة ملهاش جواب

تعبت من شكاوي ملهاش حساب

امتي يطلع النهار بقي؟ اصله طول في الغياب


انكسار وانهزام وحيرة والم امتي بقي ينتهي عصر العذاب؟ا

اعتذار متأخر

بقالى اكتر من شهرين مش فتحت المدونة
والمشكلة انى مش ليا اسباب معقوله وواضحة

مخنوقة جدا

مش عارفه اكتب
حاسه ان فى احداث كتيير فاتتنى ومش كتبت عنها

حاسة ان الافكار مش مترتبة ولا محدده


الكلمات نفسها مش راضية تخرج بالاسلوب نفسه

كل اللى اقوله ان اعتذر لمدونتى العزيزة عن غيابى الغير مبرر
يا رب افوق بقى علشان اكتب حاجة جديدة وعدله

happy birthday

النهاردة انا عندى 14 سنة



so



happy birthday to me




انشاء الله هعمل بوست قريب اكتبلكم فية عن السنة اللى فاتت من عمرى واللى جاية انشاء الله

بس دلوقتى انا مبسوطة جدا لان لقيت ناس مش كنت اتوقع انهم يفتكروا عيد ميلادى فاكرينة

بس بجد دة احلى عيد ميلاد
علما بانى مش بحتفل باعياد الميلاد زى الناس وحفلات وخروج وكدة

بس فى حاجات حلوة حصلت فى نهاية السنة 13 مع انى مش كنت متفائلة بيها
المهم اهى عدت على خير


اه صحيح فى بوست انا بقالى كتير مأجلاه عن برنامج العاشرة مساءا انشاء الله اكتبة قريب

بس الدراسة والله معطلانى شوية

هطلب طلب صغنون فى الاخر
يا ريت لو حد علق من اللى اتعاملوا معايا من خلال المدونة يبقى يكتبلى رأية فى اللى شافة منى
يعنى اية اللى وصله من شخصيتى من خلال المدونة
واية محتاج تعديل وكدة

اما بقى اللى اتعامل معايا وجها لوجة
وشاف ولو جزء منى ومن شخصيتى يا ريت يكتبلى رأيه وبصراحة

ميرسى اوى

انى ارى ،اسمع،اتكلم

بدأت حديثى معه كنقاش بسيط عن اسباب اضراب المصريين يوم الاحد 6/4 وما ان بدات الحديث عن السياسه رغم اننى ارفض تسمية هذا الحديث بحديث سياسى حيث ليس كل من اوضح رأيه فى احوال البلاد يعتبر سياسى مخضرم او انسان مثقف استطاع استخدام مداركه فى ادراك ما يحدث حوله. وما ان تبادلنا اطراف الحديث حتى شعرته كمن صعقته صاعقه كهربية شديدة
وهكذا دار الحوار:-
انا: ألديك امتحانات يوم الاحد المقبل؟
هو :نعم
انا : اذن جب عليك الذهاب للجامعه؟ هو: نعم ولكن لما تسألينى عن يوم الاحد بالأخص؟؟؟
انا:لأنه يوم الاعتصام او الاضراب المصرى
هو:ماذا؟؟؟ ولما؟
انا: السبب الرئيسى هو غلاء الاسعار بينما الرمتبات فى جمود وركود دائموهذا منافى للعقل والمنطق وليس له اى مبرر
هو:وما دخلك انتى بذلك؟
انا:انا لا اعترض فقط على غلاء الاسعار بل اعترض ايضا على احوال البلاد وتهميش الشعب
هو:لماذا تفكرين بهذه الطريقة؟
انا:وبأى طريقة يجب ان افكر؟
هو :ولكنك مازلتى صغيرة، اتركى هذا للاكبر سنا
انا: ومن تقصد؟شباب الجامعات؟
هو:لا.ان شباب الجامعات وانتى ايضا لاتزالى طالبة
انا:وهل هذا يمنعنى من التفكير فى مستقبلى؟ كيف تريدنى ان افكر كطالبه؟
أليس جيلى وجيلك هم الذين سيقودون للتغيير؟؟؟؟؟؟؟؟؟
هو:افعلى ما تشائين ولكن اتركى هذه الامور،لما تبحثين عن المشاكل؟
انا:وعن أى مشاكل تتحدث؟
هو:الا تدركى ما يفعلونه بهؤلاء الناس؟
انا: وماذا يفعلون؟ يسجنوهم، يعذبوهم ، يشردوهم؟
هو:بلى هكذا يفعلون
انا: استحلفك بالعلى العظيم، ألا تشعر بالأ سى لرؤية هؤلاء يسجنون؟ فما فعله ايمن نور كى يسجن؟طالب بحقة فى الدستور؟! وترشح امام الرئيس؟ او كمقال"مقتل الرجل الكبير" للاستاذ ابراهيم عيسى اتقوم الدنيا وتنقلب رأسا على عقب بسبب مقال صحفى بجريدة معارضه؟؟؟؟؟؟؟ ألا تشعر بالأسى لرؤية اؤلئك الذين يموتون بسبب"رغيف العيش"!! والذين يموتون يوميا على الطرقات وعلى قضبان السكك الحديديه بسبب فشل ادارى. والذين تكون قبورهم هى بيوتهم بعد ان تنهار فوق رؤسهم بسبب الاستهتار بالروح البشريه!!!!؟؟
هو:بلى اشعر بهذا الاسف والالم ولكن لما انتى؟ لما تفكرين هذا التفكير؟
انا:ان تفكيرى ليس بالتفكير الشيوعى ولا الاخوانى ولا المتطرف
انما انا مواطنه ترفض مبدا"لا أرى لاأسمع لا اتكلم"؟

اليك وحدك

انتشلتنى عيناك من ضياعى واغرقتنى فى بحر غرامك
احببتك دون ان ادرى فتنفست هواك
وعشقت رؤيتك وسماع صوتك
اتاهتنى نظرة عينيك فكم اشعرها عميقة وكم اشعر بتدفق الحنان منها كتدفق مياة النهر من منبعها
شعرت بدفء يديك دون ان المسها....فامتلكنى ذلك الشعور بالامان الذى ما ان شعرت بة فتشبثت بة حتى النهاية
شعرت بروحك تحوم حولى تلهمنى السكينة وتشعرنى بالاطمئنان
افتقدت دفء احضانك والامان بين ذراعيك
كم اشتقت اليك........كم اشتقت اليك

واسمة الضمير العربى!!!!1

صدر مؤخرا بالاسواق اوبريت الضمير العربى
موجز لاحداثة هو بعض الفنانات العرب يستعرضون جمالهن
وبجوارهن بعض الفنانين العرب يستعرضون اخر صيحات وماركات الموضة
وتتخلله بعض المشاهد لقتلى فلسطين وشهداء العراق وضحايا لبنان
حيث يجرى العرض على انغام الموسيقى المؤثرة


لاء بجد حاجة مستفزة جدااااااااااااا
شغلين اعلانات ليل ونهار عن اوبريت الضمير العربى
والواحد قاعد مستنى امتى ينزل بقى ونتفرج على حاجة اتجمع فيها العرب حتى لو كانوا ناس بيغنوا
المهم نزل الاوبريت وياريتة ما نزل
بصراحة ودة رايى الشخصى
الكلمات جميلة جدا ومؤثرة فعلا والالحان رائعة
اما بقى عن المشاهد لشهداء الاقصى وضحايا الحروب اللى تلائم كل مقطع فى الاوبريت
فكانت فوق الوصف
والراجل اللى بيجى يقول"وقفت عاجز امام ابنى اللى بنزف وروحة قاعدة طلع ما استطيع اعملة شيى"
بجد دموعة الحقيقة دى اثرت فيا جامد
والبنت الصغيرة اللى بتعبر عن راى كل الاطفال ضحايا المذابح دى
وهى بتقول "اى حياة بدى عيشها بعد ما اتحطمت كل طموحاتى اى حياة بدى عيشها فش حياة"
وهى بتوصف الاسرائلين ورصاصهم ومدافع باقل ما يوصفوا بية
كانت صادقة فى كل كلمة وف عنيها نظرة تحدى مكسورة هربان منها الامل
انها ترجع ع بيتها
يااااااه اد اية كلمتها صافية ومفيها تمثيل اد اية جواها احساس بالتحدى والكرة لليهود ويمكن كمان العرب اللى واقفيت يتفرجوا عيها وهى بضيع حياتها قدام عنيها

وعلى النقيد تماما يجوا بقى الفنانين مش كلهم طبعا مش اقدر اعمم
فى ناس كان احساسها واضح وجاية توصل رسالة
اما الباقى جايين يستعرضوا جمالهم
كلهم جايين بميكب كامل واشيك هدومهم اللى فى الدولاب
كانت بجد حاجة مستفزة
بس ازاى برضو هيجوا من غيرمكياج وكل واحدة عندها حفلة بعد ماتخلص على طول
تروح بقى تغنى اغانى الحب والجرح والاغانى اللى تحسسك ان الكون كلة بيدور حولين البنى ادمين اللى بتغنيله
حاجة بجد تفقع ضيعت من احساس الاغنية كتير
دة اذا مش كانت استهزاء بالحدث اللى بيغنوا له
كانت اية المشكلة لما يعرضوا مشاهد بس من غير الناس الجميلة دى ماتبان فى الصورة
نيجى بقى للممثلين اللى بيجوا فى الاخر
هى خلاص منة فضالى بقت علم من اعلام مصر علشنا تتطلع تمثل نجوم مصر
ولا اشرف عبد الباقى وهو مش مركز وبيبص النحية التانية
حاجة تكسف
ولا مجموعة الممثلين اللى بعد بتوع مصر بصراحة مش اخدت بالى هما جايين تبع مين
اللى لفت انتبهى كمية المكياج اللى عملاهم ولا عرايس المولد
دة منظر ناس جاية تتكلم عن الضمير العربى؟؟؟؟
ولا فنانين لبنان خلاص بقت نيكول سابا من اعلام لبنان ولا المذيع المستفز اللى اسمة ميشيل

بتتكلموا عن الضمير العربى طب وفين ضميركم انتوا وكل واحد بيكون اكبر ثروة علشان يدخل الموسوعةمن اوسع ابوباها
وفى ناس مشردين مش لقين ياكلوا

والله حاجة تكسف ولا رايكم اية؟
معلش طولت اوى المرة دى بس كنت مغلولة اوى وبفش غلى معاكوا

مبرووووووووووووووووووك

يا كل المصريين

وداعا مجدى مهنا :(

بعد صراع اليم مع المرض وعذاب طويل قد ابتلى الله عز وجل
به الاستاذ مجدى مهنا
انتصر المرض فى النهاية.
وفقدت مصر علم من اعلامها. واستاذا من الاساتذة العمالقة فى مجال الصحافة
فقدت قلم من اجرىء اقلامها واصدقها
انها بالفعل لخسارة فادحة
وكما قال الاستاذ وائل الابراشى"لقد استر الله اغلى وديعة"ذهب الجسدويبقى مجدى مهنا خالدا بكلماتة

لقد شيدتة مصر بالامس فى جنازة بالفعل تليق بمكانة هذا الجثمان
جنازة اجتمعت فيها كل طوائف مصر
كم كنت اتمنى انا اكون هناك

شكرا مجدى مهنا على كلماتك فى حياتك وعلى توحيد طوائف الشعب فى موتك

امثال مودرن

النهاردة كانت اختى قاعدة على الفيس بوك ف جروب للامثال الشعبية
هو عن اغرب مثل يعنى
فعجبتها الفكرة وفضلنا ندور على احدث الامثال
وبالصدفة لقينا مجموعة الامثال دى فى منتدى اسمى وجودى
توبك للعضو او العضوة lost_dreams
المهم انا قريتهم ومقدرتش امسك نفسى من الضحك
بصراحة عجبونى اوى
فقولت انشرهم لكم مع انى مش بحب حكايت النقل دى بس سماح المرة دى

* للى بيته من إزاز ميغيرش هدومه فى الصالون

* فاقد الشىء يدور عليه

* اقلب القدره على فومها الفول يقع منها

* تأتى الرياح محمله بالأتربة

* ياخبرالنهارده بفلوس بكره ينزل عليه أوكازيون

* اللى معاه قرش محيره يجيب حمام ويحمره

* جت الحزينه تفرح شغلت شريط حكيم وقعدت ترقص

* قال يامحششين يكفيكوا شر الكمين

* اللى ياكل لوحده يشبع

* لاتبكى على اللبن فى البسكوت

* اقطع عرق و حته بتلو

* اطبخى ياجاريه الأنبوبه فاضيه يا سيدى

* لو حبيبك عسل ما تحطلوش طحينة

* اللى يتلسع من الشوربه يتصل بالمطافى

* وبكره ترجع ريما من عند خلتها فى مارينا

* ياداخل بين البصله وقشرتها حط قطرة علشان هادمع من ريحتها

* اصوم اصوم وافطر على المدفع

* القرش الأبيض بيعوم فى البحر الأحمر

* ضربوا الأعور على عينه قالهم كسرتوا النضاره

* اللى ميشفش من الغربال يكشف نظر

* المال السايب يعلم الطلبه

* نام وارتاح وكل عسل نحل التمساح

* من خرج من داره مينساش يأخد المفتاح معاه

* الباب اللى يجيلك منه الريح شيله وركب قبنورى

* المضطر يركب التاكسى

* رب صدفة خير من ألف ليلة و ليلة

* اللى يخاف من العفريت يعمل عبيط

* المركب اللى فيها ريسين يلعبوا طاولة

* اللى خدتوا القرعه تخدو ام الخلول

what اللى ميعرفش يقول

* أكل العيش يحب الطعميه

lenses العين عليها

* قالوا للحرامى أحلف قالهم وحياة قلبى وأفراحوا

وحشتونى

وحشتووووووووووووونى

بجد وحشتونى مووووت
وحشتنى مدونتى العزيزة وحشتنى المدونات بتاعتكم
ياااااااااه بقالى كتير اوى مش كتبت بوست
وحشتنى اوى تعليقاتكم
كل دة بسبب الفترة العصيبة بتاعت الامتحانات
بس الحمد لله عدت على خير
والنتيجة طلعت كمان
والحمد لله جبت110/112 يعنى تقريبا 98%وكسر
والفضل يرجع لله سبحانة وتعالى اولا
وبعدين صديق عزيز ليا هو اللى شجعنى
ميرسى يا تومى
كان نفسى اجيب اعلى من كدة بس الحمد لله

انا عايزة اعتذر لكل الناس اللى انا مقصرة فى زيارتهم
والله ظروف الامتحانات مش اكتر
انا عارفة انى فاتنى كتير بس انشاء الله الحق اعوض
وميرسى اوى لكل اللى زاروا المدونة فى غياب
الكاونتر زاد بطريقة انا مش متوقعاها
ميرسى اوى