بتحب فيها اية؟؟؟؟؟

من كام يوم كدة
سمعت برنامج لذيذ على قناة o t.v
بيقولك يا سيدى
بتحب اية فى مصر؟؟؟؟
بجد واللة يا جماعة....السؤال لفت انتباهى
بدات احس ان احنا بنكسر قاعدة الملل
ونغير كلمة مش عجبك اية فى مصر
ونقول اية عجبك فى مصر

وبلاش الاجابات الخنيقة بتاعة ولا حاجة
ودى فيها اية عدل

فكر فيها كدة.....
والله فيها حاجات كتير حلوة

طبيعى بتسال زى اية؟؟؟؟
زى عصير القصب من عند عم على
ولا سندوتش الكبدة من ابو رامى
ولا سندوتشات الفول والطعمية من عند البغل
(قولى بقى انك ممكن تلاقى السندوتشات دى فى اى حتة تانية)
طب والنيل؟؟
المنظر الريفى الجميل
اصالة اهل ابن البلد؟
الهرم الاكبر ..وشارع الهرم الاكبر


نتكلم جد شوية

انا بحس ان الترابط اللى عند اهل مصر مش عند اى حد تانى
يعنى مهما شوفت من اصحابك
لما بتوقع بتلاقى حد جمبك
مهما البيت كان فى مشاكل
مش هتلاقى دفا زى البيت

عمر فرحتك ما تكمل منغير اهلك وحبايبك واصحابك
يعنى تخيل كدة انك تاخد دكتوراه فى مجالك
ومش تلاقى حد يهنيك؟؟؟؟

انك تلاقى فارس احلامك ومش تلاقى حد يوقف جمبك فى احلى يوم فى عمرك
هى ممكن واحدة تحسدك بس هتلاقى التانية بتقرالك سورة الفلق

لما تجيب المجموع اللى انت عايزة ومش تلاقى حد يقولك فرحتنا

لما تطق حاجة فى دماغك ومش تلاقى الجروب بتاعك
علشا تنفذوها

لما تبقى مخنوق وتنزل تمشى فى الشارع وتبص على العمارات
والبيوت القديمة اللى حواليك
وتشوف خناقات ومصايب
وفجاءة تلمح وش بنوتة بريئة بتضحكلك تنسيك همك

مهما تكون الجريمة منتشرة والبنت مش عارفة تمشى لوحدها ولا الولد عارف يمشى مطمن

بتنام فى بيتك مطمن ولا لاء
الى حد ما على الاقل

عارف ان لو (بعيد الشر)حصل حاجة
هتلاقى كل الناس حواليك
وناس يمكن اول مرة تعرفهم
وناس مش تتوقع انك تشوفهم او انهم يبقوا معاك

يا جماعة انا بتكلم عن الارض والناس اللى عايشين فيها

والله مهما شوفنا منها هنفضل نحبها

عايزة اشوف ارائكم

وسؤال فى الاخر يا ريت كل اللى يعلق يجاوب علية

بتحب اية فى مصر؟؟؟؟؟